公司每年3月份都會調整人工.我一直都好擔心今年自己有無得加薪.最大原因就係我有了BB.不出所料3月份糧真的沒有調整,真係好唔開心.難道公司真的歧視我呢個大肚婆.為了要証實真確.我走去問了幾個相熟同事.原來佢地都無被調整.難道大家都咁唔好彩.今年通脹強勁,物價持續上漲.如果人工都唔調整又如何追得上通脹呢!唉!我黎緊仲要養多個人,開支自然大咗.唔加一仟加幾佰都好,當幫補吓奶粉錢!同事話睇埋4月份糧有無就知! 

呢一個月真的過得很漫長,臨近4月尾我就天天check住自己account睇出咗糧未.就在4月28日我就收公司給我的Salaries increment letter.調整期由3月份開始,幅度與往年差不多,但比例上肯定追唔上通漲.對我呢個咁貪心既人黎講肯定唔滿足啦! 我馬上將呢個好消息話俾老公知,佢知道後比我更開心,因為佢見我呢成個月都咁擔心.當知道我有得加人工,佢都終可鬆一口氣!還說weekend返來跟我慶祝大吃一餐. 

Renee ^-^

4月15日 

孕婦正常懷孕20週就會feel到胎動,我一直都等待呢日既來臨.我呢個星期巳踏入第21週了但仍末有胎動倩況,好擔心!聽聞話脂肪積聚多肚皮厚,所以無咁容易feel到胎動,我當笑話一樁.難道係BB唔夠營養,無力踢我.Oh my god.如果係真咁我就好對唔住baby. 我周圍去問身邊有經驗朋友和健康院既姑娘,佢地話胎動好因人而異,有些人未夠20週已feel到,亦有人會好似我咁比較遲.只要係医生做例行產檢時check過BB正常就OK,唔好擔心太多.有時自我安慰話其實BB有踢可能係我反應遲鈍feel唔到啫!!! 

Renee 

4月8日

上次係威院照完唐氏綜合症後,医生幫我約埋今日免費照結構性超聲波.最近我先知原來不是每間政府医院都有提供這項service.相反係私家照就要收成$1xxx.今趟又可以慳番筆. 

今天中午收工即走,去到威院大約2:30,足足等了2個鐘,等到我發哂忟憎.最不好意思要阿May等我咁耐.呢個結構ultra sound足足照左半個小時.佢照得好詳細,BB每一部位佢都指俾我睇.什麼大腦,心臟,尾龍骨,頭仔,大腿,小腿,手掌,腳掌,手指,腳指,眼耳口鼻,有無兔唇等等…. BB大致上結構沒什麼問題.成個過程我都睇到好開心.跟住我就好直接去問 BB係男定女.佢竟然毫不猶豫好快咁答我係囡囡,唔似得上次個医生咁話只得6成準確. (當然係我預料之內.所以今天的我情緒上沒太大反應).依家見到BB健康成長,個人都放心哂,巳經不在計較BB是男是女了.我最不好意思要身邊既朋友替我緊張,佢地知我今日去照結構,巳經早一日打俾我叫我放鬆心情,唔好給自己咁大壓力.

在此,我要特別多謝呢幾位朋友: Diana, Amy, Fiona and May呢幾日既安慰和支持.還有我家人的支持也是功不可沒的. 

Renee

今日首次去粉嶺健康院覆診.overall 都OK.成個過程只不過係驗小便,量血壓,磅體重,到最後係見姑娘聽胎心跳. 今次係第2次聽胎心跳聲,每次我都好緊張,因為好驚佢地突然話我知聽唔到胎心跳.話俾你地知BB既心跳聲就好似跑馬聲咁噗!噗!噗!噗!噗!噗!好得意.自已每次聽到都好興奮.不過,姑娘話我現在週數19weeks體重比正常重左2kgs.佢話可能係我無嘔既關係.雖然係過重但佢無話要我減肥. 

下次返去粉嶺健康院覆診係6個星期後.期待中! 

Renee