  |
  
|
終於感受到做媽媽既辛苦感覺!人家話出院後媽媽要多臥床休息,不可太操勞,將凑BB大小事務交俾屋企人做。但自問是個每事都親力親為既人我又如何放心將湊小B責任全放在媽子和奶奶身上呢!所以呢個幾星期我都盡 量親身照顧小B包括換尿片、沖奶、揼奶、餵奶等。說實話,湊B真的好辛苦除了體力勞動外精神上亦消耗不少,有時自己對住BB會感到不知所措不自覺咁喊起上來。曾幾何時,我都擔心自己會患上產後抑鬱症,還好我懂得向身邊人傾訴抒發心裡面唔閞心既事,最重要身邊有老公和家人既支持。每曰看著小B一日一日咁長大,樣子每日地變化,作為媽媽既我要更加努カ,要成為一個好榜樣!
8月14日是我一生中第ニ難忘的事情。
凌晨5點~奶奶起床上班,因唔識鎖我家大門被她吵醒要勞動我呢位大肚新抱幫忙。之後順便小解再繼續找周公去。
早上6點~唉!奈何係張床翻來翻去都睡不著,就係呢個時候我感覺到有嘢想從下體流出來,我身手比平時異常敏捷咁跳咗落床,疑似水狀液體從下體大量流出,亦即是俗稱穿水。我即刻拎埋手提跑入洗手間看過清楚並同時通知老公有心理準備我要 '生' 啦!
早上6點半~通知完老公後,馬上換衫翻查手佬袋物品call埋X折的士即去威院。
早上7點~到達威院後,我直接上病房辨理入院。大約半個鐘後,醫生巡房跟我檢查話我子宮頸只開得兩度未生得(最起碼要開到8度)。有人話,穿水唔係即刻生得咩!經查問後得知要穿水超過24小時先跟你摧生。現階段唯有等啦!
早上11點~穿水情況越來越勁,好似開咗水喉咁不停流!醫生再跟我檢查子宮頸開到4度,但要等幾時先開到8度呀!還有震痛仲未出現呢!
中午12點~震痛開始出現,呢種痛楚難以形容,整個肚同背脊扯住咁痛,坐又唔係企又唔係。當時舒緩痛楚既方法我只有係病房內外行來行去或一時臥床一時又走出走廊外既長椅或梳化坐吓,盡量找個令我舒服既地方休息。
中午12點半~午飯時間,又係食啲淡而無味既飯餸。剛生完BB老友Doris提醒我一定要食飽飯否則到生既時候就無力生,亦因此我就將所有飯餸一掃而空。
下午1點半~震痛開始越來越密(差不多每隔1至2分鐘痛1次),平均每次痛20-30秒,穿水份量亦明顯多,這些加劇現象是否暗示小B即將誕生呢。現階段姑娘只要求我記下震痛次數和時間。
下午2點~救命呀!我真係頂唔住啦!我呼喊姑娘:我個肚好痛,BB好似想走出來和穿水好似缺堤咁。我形容到好誇張,之後姑娘跟我檢查並發現子宮已開到8度並決定推我落產房生。係呢個時候我即刻通知媽咪和轉告Marco知:我生得啦!(正因為呢個時間Marco係澳生見工,所以趕不及回來陪產。希望這代價來得值得吧!)
下午2點半~我換過另一套病人服後便上到另一張手術床準備推往樓下產房。
下午3點~還以為會立刻被推到產房,但點知將我推到病房既走廊等候。原來產房爆哂要我等吓!大佬,點等呀!BB要出黎啦!
下午5點~現在醫院已不再係醫生負責接生了,改為助產士。因產房仍full,我被推到某角落處。馬上便有位助產士來協助,踉我核對資料後便幫我駁機和檢查。還記得當時震痛已達到忍無可忍情度,我嗌哂救命!其實當時助產士已給我聞止痛氣(俗稱笑氣),係有多少止痛功效,但止標不止本。助產士教我每有震痛就吸一吓笑氣,但係我已吸到個人暈拕拕,反白眼,手腳已無力。助產士見我子宮頸已閞到9度協助我嘗試生奈何多次都不成功。助產士在旁鼓勵我:「竹菁,用力啦!係啦係啦!再出力,唔好嗌,留番啖氣再出力......」。不成功原因係我用錯力度,呼吸跟動作都不配合。在痛苦既過程中,我終於感受到做媽媽那種偉大情操。但是,我暗地裡又埋怨老公點解要我生BB。我同小B講你快啲出黎啦,媽媽真係好辛苦呀!當時既我簡直像個癲婆,個人郁來郁去到件病人服都鬆哂,頭髮亂槽槽又滿頭大汗,人唔似人。稍後,我被正式推入獨立產房,助產士再次協助我生,每當震痛那一刻我便要出盡九牛ニ虎之力去push、push。見我多次失敗,便多一位助產士加入按我肚皮幫我將BB推出來。助產士話我知已見到BB頭仔,當時既我已全身無力,口又乾,但我唔想再辛苦落去,唯有出盡我最後一啖氣。最終小B成功順利來到這個世界,正正式式加入'大洪雲妮之家'。
下午6點半~生完小B成個人鬆哂。姑娘將小B放在我身旁片刻,看著小B那一刻我真正感受到做媽媽果種感覺。姑娘好細心用毛巾同我抹掉一頭既大汗又遞上一杯暖水,仲借我電話通知家人,她們那份細心和無微不致既照顧令我難忘。我第一時間通知一直守在門外既老公和在家裡心急如焚既媽咪,助產士仲好好人推咗小B出去俾Marco睇。之後,等埋醫生縫合傷口約8點半便將我推回病房休息。
我的10個月懷孕過程就此完成。
後記: 我算是十分幸運,今次我在威院遇到的姑娘和助產士都十分好人,對我這位大肚婆很細心又有耐性。我曾經想過寫張感謝咭給她們奈何出院後湊B太忙沒有做到。
。晚晚OT到7點半,做到我成個人都'謝'唒
!
